Министерот за животна средина и просторно планирање Насер Нуредини, на покана и во организација на Енергетската заедница, денес, во Брисел, учествуваше како панелист на настанот на високо ниво за прекуграничниот механизам за прилагодување на јаглеродот CBAM (Carbon Border Adjustment Mechanism), кој е во завршна фаза на усвојување од страна на Европскиот парламент.
На настанот, високи претставници на Енергетската заедница разменија мислења за функционалноста на CBAM мехaнизмот и перцепциите далиистиот може да биде клин на раздор или е катализатор на Енергетската заедница.
Во своето обраќање, министерот Нуредини се осврна на тековните активности на национално ниво во делот на климатската акција и националните определби за зелена транзиција на економијата, како и постигнување на целите за декарбонизација на производствените процеси. При тоа министерот Нуредини истакна дека Република Северна Македонија сака да биде дел од решението и остварувајќи ги амбициозните климатски цели до 2050 година да постигне јаглеродна неутралност.
Но, исто така укажа дека како држава кандидатка за членство во ЕУ сме исправени пред предизвик за прилагодување националното законодавство со тоа на ЕУ (кое е динамично), и тоа не само од легислативен, туку и од административен и технички аспект, дека сме во фаза на креирање на предлогот за јаглеродно таксирање, но сме соочени со уште поголемиот предизвик, а тоа е праведната транзиција на економијата.
Од таа причина од клучно значење ќе биде континуираната поддршка од страна на ЕУ и од финансиски и од технички/експертски аспект.