Zëvendësministrja e Mjedisit Jetësor dhe Planifikimit Hapësinor, Hristina Oxhaklieska, mbajti fjalimin e saj në segmentin “Drejtimet e reja rajonale energjetike”, pjesë e Forumit të dytë Ekonomik, që po mbahet sot në Shkup.
- Investimet e huaja jo vetëm që ndihmojnë në përshpejtimin e zhvillimit ekonomik dhe hapjen e mundësive të reja punësimi, por në të njëjtën kohë ofrojnë përfitime të tjera, si kalimi në teknologjinë e gjelbër, zbatimi i qasjeve më të fundit inovative dhe arritja e prioriteteve të zhvillimit të gjelbër – tha Oxhaklieska në Forum.
Sipas saj, kriza ekonomike dhe energjetike me të cilën po përballet bota sot tregoi se sa e rëndësishme është që shteti të ketë burimet e veta dhe të qëndrueshme të energjisë dhe të jetë ekonomikisht i qëndrueshëm, gjë që forcoi ndjeshëm ambiciet e RMV-së për sa i përket tranzicionit të gjelbër, veçanërisht në kontekstin e Agjendës së Gjelbër për Ballkanin Perëndimor.
- Koordinimi dhe harmonizimi i përpjekjeve tona kombëtare me ato të rajonit është jashtëzakonisht i rëndësishëm. Nëse duam të shkojmë larg, duhet të veprojmë së bashku – shtoi zëvendësministrja Oxhaklieska.
Ngjarja organizohet nga Forumi Ekonomik nga Delphi dhe Shoqata Greke e biznesit në Maqedoninë e Veriut, në partneritet dhe bashkëpunim me kompanitë vendase, dhe qëllimi i tij është të identifikojë dhe vlerësojë sfidat kryesore për rritje, të mësojë nga përvojat e vendeve të tjera, mbështetja e adoptimit të praktikave për inovacion social të korporatave në sektorin privat dhe identifikimi i drejtimeve të veprimit politik për krijimin e ekonomive konkurruese dhe gjithëpërfshirëse në Maqedoninë e Veriut dhe Evropën Juglindore.
Në margjinat e ngjarjes, zëvendësministrja Oxhaklieska ka zhvilluar një takim me kryeministrin e Malit të Zi, Dritan Abazoviq, ku është diskutuar për rëndësinë e zbatimit të Agjendës së Gjelbër në Ballkanin Perëndimor.