Zëvendësministrja e Mjedisit Jetësor dhe Planifikimit Hapësinor Hristina Oxhaklieska, mori pjesë në seancën e 113-të të Këshillit të Organizatës Ndërkombëtare për Migrim (IOM), që po mbahet në Gjenevë, në periudhën prej 29 nëntorit deri më 2 dhjetor 2022.
Ajo trajtoi një segment të nivelit të lartë që u fokusua në lidhjet midis ndryshimit të klimës, sigurisë ushqimore, migrimit dhe zhvendosjes.
- Vendi ynë është veçanërisht i ndjeshëm ndaj ndryshimeve klimatike, si dhe ndaj shfaqjeve ekstreme të pafavorshme klimatike. Sektorët më të kërcënuar janë sektori i ujit, bujqësia, pylltaria dhe biodiversiteti. Megjithatë, Republika e Maqedonisë së Veriut e njeh nevojën për t’u marrë me efektet e ndryshimeve klimatike dhe promovon masa efektive të përshtatjes që kanë të bëjnë me sektorët kyç të ndjeshëm – theksoi zëvendësministrja Oxhaklieska.
Ajo sqaroi gjithashtu se në periudhën e kaluar janë bërë hulumtime dhe matje për ekspozimin, ndjeshmërinë dhe kapacitetin adaptues në rajone dhe komuna të ndryshme të vendit. Gjetjet treguan se kapaciteti i shoqërisë dhe i qytetarëve për t’u marrë me efektet e ndryshimeve klimatike nuk është i shpërndarë në mënyrë të barabartë dhe ndryshon në varësi të komunave.
- Masat për trajtimin, për ndihmë, edukimin dhe veprimin e synuar të autoriteteve shtetërore duhet të kenë parasysh shpërndarjen e pabarabartë nëpër rajone të ndryshme, si dhe numrin dhe përshtatshmërinë e popullsisë së prekur në komunat e ndryshme – tha Oxhaklieska.
Në fund, ajo theksoi se vendi ynë mbetet i përkushtuar për konceptimin dhe zbatimin e strategjive të duhura për trajtimin e këtij problemi në dokumentet tona strategjike, veçanërisht në fushën e përshtatjes së sektorit të bujqësisë ndaj ndryshimeve klimatike.
Sesioni i 113-të i Këshillit ofron një mundësi për të diskutuar ndikimet e ndryshimeve klimatike në sigurinë ushqimore, si dhe ndikimin e zhvendosjes në sistemet e ardhshme të menaxhimit të migracionit, në mënyrë që të identifikohen mjetet me të cilat do të sigurohet që shtetet të mund të përgjigjen në mënyrë efektive dhe efikase për të mirën e të gjithë qytetarëve të interesuar.
Diskutimi bazohet në progresin e bërë në sesionin e njëzet e shtatë të Konferencës së palëve të Konventës kornizë të Kombeve të Bashkuara për Ndryshimet klimatike (COP27) dhe merr parasysh reagimet e Shteteve anëtare ndaj Deklaratës mbi progresin e bërë në Forumin eparë ndërkombëtar për rishikimin e migracionit lidhur me “ndikimin e krizave financiare dhe ekonomike, varfërinë, emergjencat shëndetësore dhe sigurinë ushqimore ndaj migrimit ndërkombëtar dhe migrantët, si dhe fatkeqësitë natyrore, efektet negative të ndryshimeve klimatike dhe degradimin e mjedisit jetësor”.