Zëvendësministrja e Mjedisit Jetësor dhe Planifikimit Hapësinor, Ane Lashkoska, sot hapi mbledhjen e parë të Komitetit Drejtues të projektit “Mbështetje për anëtarësimin në BE në fushën e mjedisit – Faza 2”, në të cilën u prezantuan aktivitetet e deritanishme të parashikuara në kuadër të këtij projekti, i cili financohet nga Agjencia Suedeze për Mbrojtjen e Mjedisit (SwEPA), mbi bazën e një Memorandumi bashkëpunimi të nënshkruar me Ministrinë e Mjedisit Jetësor dhe Planifikimit Hapësinor, për realizimin e një programi dyvjeçar.
“Ministria e Mjedisit Jetësor dhe Planifikimit Hapësinor, në përputhje me zbatimin e kuadrit ligjor kombëtar dhe marrëveshjeve ndërkombëtare për mbrojtjen e mjedisit dhe ndryshimet klimatike, vazhdon të realizojë një gamë të gjerë aktivitetesh të orientuara drejt ruajtjes së biodiversitetit dhe përmirësimit të sistemit kombëtar të zonave të mbrojtura.”
– theksoi Lashkoska në fjalën e saj, duke hapur mbledhjen e Komitetit Drejtues të projektit.
Qëllimi kryesor i këtij projekti të rëndësishëm është forcimi i kapaciteteve institucionale të Ministrisë së Mjedisit Jetësor dhe Planifikimit Hapësinor në koordinimin dhe menaxhimin e procesit të anëtarësimit në Bashkimin Evropian, në sektorin e mjedisit. Për më tepër, projekti siguron mbështetje për negociatat e Kapitullit 27 dhe nxit bashkëpunimin ndërsektorial mes ministrive, vendimmarrësve dhe palëve të interesuara në nivel lokal, kombëtar dhe rajonal, me qëllim lehtësimin e menaxhimit efektiv të biodiversitetit dhe përpjekjeve të vendit tonë për përshtatje ndaj ndryshimeve klimatike.
Aktivitetet do të fokusohen në ngritjen e kapaciteteve dhe nxitjen e partneriteteve e bashkëpunimit mes të gjitha palëve të interesuara, me qëllim menaxhimin efektiv të biodiversitetit dhe përmirësimin e përpjekjeve për përshtatje ndaj ndryshimeve klimatike. Në mbledhje u theksua rëndësia e mbështetjes suedeze në procesin e integrimit evropian të vendit tonë.
Zëvendësministrja konfirmoi përkushtimin e Ministrisë së Mjedisit Jetësor dhe Planifikimit Hapësinor për zbatimin e vazhdueshëm të aktiviteteve që do të kontribuojnë në përmbushjen e standardeve evropiane në fushën e mjedisit.
