Заменик министерката за животна средина и просторно плaнирање Христина Оџаклиеска денеска, ја отвори онлајн обуката за постапката за спроведување на спогодување од областа на животната средина наменета за овластени инспектори за животна средина.
- Сметам дека овие средби и обуки придонесуваат за континуирана и ефикасна комуникација при примена на законската регулатива за заштита на животната средина – истакна на отворањето заменик министерката Оџаклиеска, потенцирајќи дека овластен инспектор за животна средина, според законот треба да има секоја општина, за правилно спроведување на законите од областа на животната средина.
Со цел да се реализира процесот на поддршка кон единиците на локалната самоуправа, во Министерството за животна средина и просторно плaнирање функционира Сектор за соработка со локалната самоуправа и управно надзорни работи, чија задача е комуникација и соработка со општините во областа на животната средина. Во рамки на овој сектор функционираат Прекршочна Комисија и Комисија за спогодување кои имаат улога да постапуваат по барања за поведување на прекршочни постапки и постапки за спогодување, поднесени од страна на државни инспектори за животна средина и овластени инспектори за животна средина.
- Преку денешната обука, овластените инспектори за животна средина ќе се запознаат со постапката за спогодување и поднесување на барања за поведување на постапка за спогодување, првенствено до Комисијата за спогодување при Министерството, согласно законите од областа на животната средина – рече Оџаклиеска.
Денешната обука е дел од почнатиот процес на јакнење на капацитетите во општините – за да се овозможи правилна примена на законите од областа на животната средина, што има стратешка важност за одржлив развој на општеството во целина.