Sot u mbajt ngjarja hyrëse për përgatitjen e Projekt – Planit për menaxhimin me Parkun Kombëtar “Mali Sharr”.
Ngjarja hap një kapitull të ri për Parkun Kombëtar të ardhshëm Mali Sharr. Fokusi i diskutimit, nga pyetja “a duhet të kemi një Park Kombëtar”shtrohette pyetja “si do të menaxhohet ai”. Projekt-ligji për shpalljen e një pjese të Malit Sharr për Park Kombëtar është në procedurë parlamentare dhe pritet të miratohet së shpejti, i cili përfundimisht do t’i japë Republikës së Maqedonisë Veriore parkun e 4-të kombëtar, dhe 13.2% e territorit do të shpallet zonë e mbrojtur. Zonat e përcaktuara të Parkut Kombëtar të Malit Sharr janë të rëndësishme për mbrojtjen e natyrës, por ato janë gjithashtu të rëndësishme për të siguruar një zhvillim të qëndrueshëm në të ardhmen dhe ekoturizmin, i cili do të mundësojë prosperitet si për natyrën ashtu edhe për njerëzit.
Ngjarja është organizuar nga Zyra Rajonale e IUCN për Evropën Lindore dhe Azinë Qendrore (ECARO), Ministria e Mjedisit Jetësor dhe Planifikimit Hapësinor (MMJPH) dhe Programi i Kombeve të Bashkuara për Mjedisin Jetësor (UNEP).
- Jam krenar që sot kemi filluar të përgatisim Projekt – Planin për menaxhimin me Parkun Kombëtar Mali Sharr në bashkëpunim me IUCN dhe UNEP. Plani i menaxhimit do të jetë një mjet për ndërmarrjen e re publike Parku Kombëtar Mali Sharr, për të siguruar mbrojtjen e biodiversitetit dhe ruajtjen e botës së egër në park, por edhe për të përmirësuar mirëqenien e popullatës lokale, krijimin e vendeve të gjelbra dhe përmirësimin e infrastrukturës së gjelbër dhe sherbimet. Me hapjen e procesit për përgatitjen e projekt-planit të menaxhimit, ne duhet të përqendrohemi në qëllimin tonë të përbashkët, mirëmbajtjen e Malit të Sharrit me vlerat e tij mjedisore, sociale dhe kulturore.Ne po flasim për praktikën, funksionalitetin dhe zbatueshmërinë në krijimin e së ardhmes për rajonin – theksoi Ministri Nuredini në fjalën e tij përshëndetëse.
- Ne jemi të lumtur dhe mirënjohës që procesi i shpalljes tashmë është në fazën e fundit. Por vlerat natyrore dhe socio-ekonomike të identifikuara nuk do të nënkuptojnë mjaftueshëm nëse nuk dimë si t’i vlerësojmë ato dhe të sigurojmë menaxhim të qëndrueshëm. Prandaj, në periudhën vijuese, me mbështetje shtesë nga IUCN, ne do të punojmë në zhvillimin e një propozim-plani për menaxhimin me Parkun e ardhshëm Kombëtar Mali Sharr. Ne bëjmë thirrje dhe shpresojmë për përfshirje aktive të publikut, të gjithë palëve të interesuara, në mënyrë që të sigurojmë mbrojtjen e natyrës së bashku me zhvillimin socio-ekonomik, veçanërisht në zonë – tha Iskra Stojanova, koordinatore e projektit, Programi i OKB-së për mjedisin jetësor.
Boris Erg, drejtor i Zyrës Rajonale të IUCN për Evropën Lindore dhe Azinë Qendrore, tha: “Kanë kaluar gati 15 vjet që nga biseda e parë, kur vendi juaj iu drejtua zyrës sonë në Beograd. “Shumë aktivitete janë zbatuar për të arritur deri te ky moment.” Z. ERG theksoi përbërësin rajonal të mbrojtjes së këtij masivi malor, duke theksuar se përveç bukurive natyrore, mali Shar karakterizohet nga një sërë vlerash kulturore për të cilat duhet të sigurohet gjithashtu mbrojtje.
Pas fjalimeve hyrëse, Z. Daniel BOGNER, si një ekspert kryesor dhe udhëheqës i ekipit, prezantoi qëllimet, aktivitetet dhe metodologjinë për hartimin e Planit të Menaxhimit të Parkut Kombëtar “Mali Sharr”.